مقال اليوم، لست أنا صاحبه، ولا أعرف كاتبه، وأستأذنه في السطو عليه (بتصرُّف، واختصار)، باسم الملايين الذين يتطلعون لعضوية البرلمانات العربية، والملايين من الشعوب العربية التي تُريد معرفة كيف تختار عضو البرلمان، أو مجلس الشعب، أو الشورى.. وهو بعنوان:

كيف تصبح عضو مجلس شعب في 100 يوم؟:

1. فصّل 5 جلبيات (ثياب) بلدي صوف غاليين بالقميص الأبيض اللي تحتيهم وشال كشمير محترم.. وبوس أي حد تقابله.

2. احضر أي مناسبة عزاء في دائرتك... وبوس أي حد تقابله.

3. احضر أي فرح دُعيت إليه أم لم تُدعَ، وسلَّم على أهل العريس والعروسة... وبوس المدعوين.

4. ادبح عجل ووزّعه على الناس اللي ممكن تحشد لك أصوات... وبوس الجزار.

5. لا تقرأ في السياسة، لأنك مش هتفهم حاجة، وإذا حد من المواطنين سألك أي سؤال سياسي ترد بإجابة واحدة ربنا يصلح الحال... وبوس المواطن.

6. تسمع عن بناء مدرسة، أو رصف شارع، تروح كاتب مقال تطالب فيه ببناء المدرسة ورصف الشارع، وعند إقامته تدّعي أنَّك أنت اللي عملته، وتبوس مسؤول المقالات في التحرير.. بعدين تروح وتتصوَّر وتبوس رئيس البلدية.

7. أي مسجد هيتبنى تروح وتدفع تبرُّع مالوش لزمة، عشان تحضر افتتاح المسجد كأنك أنت اللي بنيته... وبوس المصلين.

8. أي فرصة للخطابة في أي مناسبة، امسك الميكروفون وقول كلمتين مش مهمّين... وبوس الحاضرين.

9. كل منطقة تزورها اسألهم إيه اللي ناقصكم؟، يعني قال انت اللي ها تكمله، مش مهم... وبوس المنطقة.

10. صاحب طوب الأرض واقعد عالقهاوي ولمّ شلّة حواليك، بحيث يكون ليك هيبة كدة وزيطة كدَّابة، ودايماً صوتك يبقى أعلى من كل الموجودين للفت النظر والانتباه، وتبوس كل الناس على القهوة، ويا سلام بقى لو بتشرب شيشة كمان بتحس إنك معلم وابن سوق وفاهم في كل حاجة... وبوس الشيشة!!

#نافذة:

(دي وصفة سهلة، دي وصفة هايلة... مع السلامة، مع السلامة، مع السلامة يا بوعمة مايلة).

صلاح جاهين