محاورة

رشيد الــزلامي
ياتركي الفين نسمع عنك بعض الكلام
ومطير ماودنـا نشـذب عراقيبهـا
اما ليا جيتنا وقـف .. ورد السـلام
ولا نكبنـاك نكبـه مانـت داريبهـا
تركي الــميزاني
السر مدفون مابين اللحم والعظام
واهل المواجيب ماننقص مواجيبها
أنا سلامي عليكم .. مرةٍ كل عـام
واهل الهناديب ماتنفع هناديبهـا
رشــيد الزلامي
انته من العام تخلطها حلال وحرام
ماعاد لك قبلةٍ تعـرف تصليبهـا
تشيل عشرين طلقه ميته بالحزام
وتزهب البندق العجرا وترميبهـا
تـركي الميزاني
اللي يقول الحقيقه مايجيـه المـلام
والنار يا كثر من يشعـل مشاهيبهـا
إن كان عين الزلامي مايجيها المنام
من يرخي إذنه لهرج الناس يوحيبها
رشيد الزلامي
ترا معـي حيلـةٍ لمخالفيـن النظـام
والله لخليـك يا تركـي تهذريبـهـا
وإني لطاردك وسط المملكه شرق شام
ليـن الطـروق الرزيلـه ماتغنيبهـا
تـركي الــميزاني
أنته.. وانا.. كلنا متقاسمين الطعام
لكـن الايـام لا تامـن عواقيبـهـا
ياراعي الخشم خشمك لا يجيه العرام
لحيتك تقديرها من قـدر أشانيبهـا
رشيد الزلامي
الوقت يا شاعر المطران جاله سنام
لكن عوجة رقبته.. وش نسويبهـا
والحر يشبك بفرخٍ من فروخ الحمام
يا طيبها يوم جابت صقر ياطيبهـا
تركي الــميزاني
صل الفرايض وحج البيت واقض الصيام
لا عـاد سبحتـك للعالـم تواميبـهـا
النور يا شاعر الروقه.. يزيل الظـلام
وحنـا صقـور تعشيهـا مخاليبـهـا
رشيد الــزلامي
انتم قبيله لكن الطق فـك اللحـام
مطير قوم خلقنـا الله لتعذيبهـا
سقناك من قلة الحره لغربي نعام
ديار تصبح بها.. وديار تمسيبها
تـركي الــميزاني
أعرف عشيره واعرف الجمش واعرف جهام
ياشيب عينـك مـن المطـران يـا شيبهـا
تحمد الله.. وريـح فـوق ريـش النعـام
ضيوفـكـم ماتـبـا تـجـرح معازيبـهـا
رشيد الـزلامي
انته تعرف الدير.. لكن بيـاع خـام
ماغير تمشي وكـل أرضٍ تعشيبهـا
حنا ليا حميت الهيجا وحصل الزحام
نشرب فناجيل خلـق الله ونرميبهـا
تـركي الميزاني
أنا من اهل الأشده في نهار الزحـام
رجليك ابا أنشدك من كسر عراقيبهـا
ياهل الفناجيل جاكم ردهـا بالتمـام
من حول أهل المناصب من مناصيبها
رشـيد الزلامي
صاحبك شايب لكن انته بسن الفطام
أعرف علوم ماظن ألفين يدريبهـا
والله يالولا حياي من الرجال الحشام
لا قولها صح وآخليك تسريبهـا
تركي الميزاني
انته تحلم ولا غشتك غير الحلام
راجع دفاترك تلقـا فـي مكاتيبهـا
وراك ما قلتها ياصاحبي من شمـام
حتى إن حملتك في ظهرك تزوزيبها
رشـيد الزلامي
يامطير ماعاد ينفعكم شراب وطعام
من يوم فارقتم أم الرمث وشعيبها
قامت عليكم دروز ماتعرف الكلام
وانتم كما العقرب اللي تلوي ذنيبها
تـركي الميزاني
جدك توفي وفارق ناقشات الوشام
وابوك شيب وهيبتنا يهذريبهـا