ثقافة
ريق المسافات
تاريخ النشر: 07 يناير 2017 04:04 KSA
اللي أحسّه شي، ماهو بـ عادي
صعبه تشيله عنّي سْطور وابيات
مرّه اشوف انّي ابغرق، وانادي
لكنّ آهي.. دايم بـ حلقي تْبات
فيني حنين، وقوّ شوق، وعنادي
أقسى من التأنيب ومحاسَب الذات
أنفاس صدري تحتدم في فؤادي
وما شفت فـ التنهيد راحة وملهاة
أشيا كثيرة.. خلّت الجو، هادي
هي نفسها صكّت عليّ المساحات
من ضيقة لْـ عزلة لـ حبس انفرادي
كل أمنياتي.. واعدتني، ولا جات
ودّي، ألـوّن.. كل شيٍ.. رمادي
في دنيتي وأرسم من الدمع ضحكات
وأرمي ورا ظهر الدروب ابتعادي
وأنقش على أرْصفة المواعيد خطوات
رحلة ضياعي.. ما تحقق مرادي
خلّص فتيل العمر واحْترقت أوقات
بس التعب لا صار بـ الحيل بادي
آيّات حيل يبلّ «ريق المسافات».